ГӏалгӀай мехка къаман тӀабувхабеча гӀирса тохкам бу
ГӏалгӀайчен культуран даькъерча кхетачений, халкъа кхоллама Республикански Цӏен этнографе отдела болхлоша дика дӀахьош ба гӀалгӀай къаман Ӏадатех болча гӀирса тохкам. Хутенаькъан Тамилас, Цӏолой Заремас цхьана суртанчаца-иллюстраторца Гӏазданаькъан Зинайца дӀахьу XVӀӀ бӀаьшере дӀадолалуш - XX бӀаьшерашка гӀалгӀай къаман хинна маӀача наьха, кхалнаьха Ӏадатех дола дувхар мишта хиннад довзара дола хоамаш а каьхаташ а гулдеш бола болх.
«Цу тайпара тохкама болх дӀабахьаро таро лу гӀалгӀай къаман культуран тӀехьале лорае, хургдолча ноахалашта къаман культура, дай Ӏадаташ довзаргдолаш», - аьлар «Сердало» газетага РДНТ кулгалхочун гӀончас Котанаькъан Марема.
Йоккхача проектаца бехктокхаме хила веза, цу юкъе эксперташта хетар а доаккхаш. Дика новкъостал ду из проект кхоачашъяра ГӏалгӀай Паччахьалкхен Малсаганаькъан Т. цӀерагӀча музея говзанчаша. Иштта белгалде лов, ГӏалгӀайчен Ӏоахарганаькъан Ч. цӀерагӀча Ӏилма-тохкама института болхлочо, философе Ӏилмай кандидата Аьгенаькъан Лемкас, цу даькъ тӀа цун балха говзало юкъеденар тха тохкамашта мах баь варгвоацаш да.
РДНТ этнографе отдело дӀахо де лаьрхӀачунна чудоагӀаш да, XVӀӀ - XX бӀаьшерашка лелабаьча гӀалгӀай Ӏадатий кхалнаьха гӀирс кердабаккхар. Цо таро лургья къаман гӀирса тамашийна моттигаш лорае а, из наха гойта а, цунца цхьана гӀалгӀай культура, Ӏадаташ лораде а.
