Курьераш да тхо, яхаш, нах Ӏехабеш хиннараш лохаш да Ӏаьдал
Курьерски гӀулакха а почта а болхлой да тхо, аьнна, Ӏехаяь, кхалсагагара ахча дихьараш лохаш ба мехкарча полице болхлоша. Из хоам «Сердалога» бир Ӏаьдала болхлоша.
«МВД болхлой болча латкъа енача мехкарча яхархочо дийцачох, «WhatsApp», «Телеграм» оагӀонашка гӀолла цунца бувзаме баьнна, курьерски гӀулакха, почта декхараш кхоачашду болхлой да тхо, аьнна, из Ӏехаяь, микрозайм цунга чудалийта, шоай номер тӀа цунга ахча дӀатӀатассийта, байна дӀабаьннаб зуламхой», - йоах тхога бенача хоамо.
Ахча бекхаьчача зуламхоша цу миноте бувзам хоадабаьб. Полици уж лохаш болх дӀахьош я. Белгалде деза, из тайпара тийшаболх бахархошца хӀара денна хӀана бац аьнна нийслулга.
Ӏаьдала болхлоша даггара кхайкарал деш хьадоагӀа, боккъал а ма теша малашб ца ховча нахах, ма Ӏехадайта шоаш, яхаш, бакъда моллагӀча хӀамах атта тешаш бараш дукхагӀа хулаш латт.
МВД къахьегамхоша дехар ду массаза санна, боккъал а фийла хила, интернетерча малашб ца ховча нахацара йохкар, эцар дита! Цхьаккха сага ахча дӀатӀа ма тувса, шоай карта номераш дӀа ма ала! Уйла е оашош моллагӀа хӀама хьадилехь!
