Шоай декхарех дувцаш, кхетаченаш дӀакхухь мехка СВО доакъашхоша
11.03.2025 09:56
Тайп-тайпарча кхетаченашка дакъа лоацаш хул вай мехка СВО доакъашхой, цар гаргара нах. Галашкарча культуран цӀагӀа дӀайихьар укх деношка цу тайпара Денала урок. Из хоам «Сердалога» бир «Даьхен лорбой» яхача ганза доакъашхоша.
«ДукхагӀча даькъе цига гулденнараш бераш дар. СВО ветеран волча Ӏарапханаькъан Мухьмада дийцар, бӀухо малагӀа оамалаш йолаш хила веза. Цо белгалдир, вай къаман бӀухой майрал, денал гойташ духьаллатташ болга», - хоам бу тха газетага.
Кхетаче иштта дийцар, бӀухошта духьала нийслуча дагадоацарех, чоалханеча гӀулакхех. Къаман къонгий турпалал гойташ, Даьхен гӀулакха латтараша кхоачашдеча декхарех дувцаш, кхетаче хилар цох.
