Юха а «Мехка сагӀа» де лаьрхӀад
Карарча шера, ГӀалгӀайче бусалба наьха Ид аль-Фитр (Мархаш) долаш, юха а «Мехка сагӀа» де лаьрхӀад. Цхьан хана мехка кулгалхочо Келаматанаькъан Махьмуд-Ӏаьлас хьалхадаккхарах дӀадоладаь дика Ӏадат дӀахо дӀахьош да, цу юкъе дакъа лоацаш ба цу гӀулакха юстара хила безам боацараш. Укх наькъа цунна юкъе дакъа лоацаш хургья республикан дикача гӀулакхий ганзаш, рузкъан дай, шоай лоӀамагӀа дика гӀулакхаш деш лелараш, цар деш дар боккха маьл болаш хӀама да.
«ЛоархӀаме да, вай мехка хӀара вахархо цу бусалба наьха деза денош долаш, шоашта терко елга хоалуш хилар. Баркал оал аз цу юкъе дакъа лоацарашта. Ид аль-Фитрах ГӀалгӀайчен массаболча бахархошта йоккха дегагӀозле хийла», - язду ший телеграм-канале ГӀалгӀайчен кулгалхочо Келаматанаькъан Махьмуд-Ӏаьлас.
Укх наькъа сагӀа доаккхаш, таро йоацача наха 4000 кхачан кхоачам лургба. Бекарга бетта 5-ча дийнахьа из болам дӀахьоргба МагӀалбик-Шахьаре, МагӀалбика, ЖӀайрахьа кхалешка, Лохерча Курпе, Къаскима. ШоллагӀча дийнахьа болама чуйоагӀаш хургья Илдарха-ГӀала, Шолже, иштта Шолжа кхале. 7-ча, 8-ча деношка из сагӀа дергда таро йоацаш Магасе, Наьсаре, Наьсарен а Пригородни а кхалешка бахарашта.
