Кхо саг леш авари яьча вахархочунна, 8 шу суд кхайкайир
06.05.2025 12:40
Барайтта шерга кхачанза дола ши бер юкъе долаш, кхо саг леш хиннача аварена бехке вир Ӏаьдала болхлоша МагӀалбика кхалера 66 шу даьнна вахархо. 2024-ча шера гуйран хьалхарча бетта 15-ча дийнахьа хиннад из унзара хатар Инаркъени МагӀалбикаи юкъе уллача новкъа. Из хоам «Сердалога» бир МВД болхлоша.
Ӏаьдало дӀабихьача тохкама балхо гучадаьккхар; из саг, корта бохабу малар менна волаш, «УАЗ-315195» машинаца наькъ тӀа ваьннилга. Наькъа оагӀонца лаьттача машинаца хиннача 58 шу даьннача вахархочоа, 18 шерга кхачанза болча кагирхошта тӀатехай цо машин. ЦаӀ цу моттиге, вож шиъ дарбанче веннав, кхы хьа ца кхеташ. Цу доккхача зулама бехке волчо 8 шу суд токхаргья.
