«Чемпион» яхача ФОКа спортсменаша 11 майдилг яьккхар
MMA-KFL оагӀонцарча клубашта юкъерча дунен чемпионате 11 майдилг йоаккхаш, белгалбаьлар Яндарерча ФОКа спортсменаш. Из хоам «Сердалога» бир цу моттигера.
«Яхьан программе белгалбаьннараш ба лакха говзал йолча тренераша кхебаь спортсменаш. Яхьаш лаьттача шин дийнахьа хьакъоастабир толашагӀбараш. «Чемпион» яхача ФОКа спортсменаша 4 дошо, 2 дото, 5 борза майдилгаш яьхар. Коталон лагӀа тӀа баьлар Хамхой Мухьаммад, Пхьилекъонгий Абабукар, Баркинхой Джабраил, Оздой Хьусен. ШоллагӀча моттиге эттар КӀарачӀанаькъан Мухьаммад, Налганаькъан Мухьаммад, кхоалагӀча лагӀа тӀа баьлар Янднаькъан Гилани, Оздой Хьусен, Дахкилганаькъан Ахьмад, Янданаькъан Расул, Медаранаькъан Ислам», - дийцар тха газетага.
ФОКа кулгалхоша доккха баркал кхайкаду спортсменашца болх баьча тренерашта, берий даьшта, ноаношта; спортаца бувзам бола тӀехье ураоттае гӀо дарах.
