Гӏалгӏай мехка меттаоттайир боккхача дезала наьна бокъонаш
Гӏалгӏай Республикан сага бокъонех волча викала Аппарате леткъар боккхача дезала нана. Пхи бер кхоабаш ягӏа из, царех цаӏ заӏапхо ва. Цо белгалдир, ший вахара бокъонаш телхаеш хилар: 2025 шера денз, цунна хьадаланза да ха яха саг хиларах доагӏаш дола пенси. Кхалсага ший ханнахьа заявлени дӏаеннай, доагӏаш дола каьхаташ а кийчдаьд, законо дӏадехаш ма хиллара. Бакъда хӏама хувцалуш дац, дукхача хана денз, е уж каьхаташ тахкара болх а дӏаболабаьб, аьнна, хоам баьбац.
«Цу кхалсага бокъо яккхара тӏехьа, сага бокъонех волча викала, Россе Вахара ганзе, бокъонаш меттаоттаяра лаьрхӏа дола дехар дӏадахьийтар. Из болх тохкаш, гучадаьлар каьхаташта юкъе цу кхалсага бер заӏапхо хилар чӏоагӏдеш йола справка цахилар. СФР хоам бир лорий-социальни экспертиза ераша оттадаь мухьар нийса цахилар», - аьлар «Сердало» газетага Гӏалгӏай республикан УПЧ хоамий-аналитически центре.
Сага бокъонех волча викала кхайкарал даьчул тӏехьагӏа, цу кхалсага пенси хьахьожадир. Цу юкъедоагӏаш хилар, 2025 шера тушола бетта денз 2026 шера наджгоанцхой беттага кхаччалца доагӏаш дар, цун еррига вахара бокъонаш а меттаоттаяьй.
