ГӀалгӀайче уголовни гӀулакх хьадийллар зуламаш леладарах
ГӀалгӀайче гӀолла йолча Россе МВД «Малгобекский» МО уголовни гӀулакх хьадийллар хӀиллан тӀагӀолла зулам леладарах, из дувзаденна да Йоккхача Ачалкхе яхача кхалсага ший ворхӀ бера, цу юкъе 2011-ча шера бекарга бетта енна йиӀиг а йолаш, алименташ хьаийдаь хиларца, яхаш, дийцар «Сердало» газетага бокъонаш лораераша.
Полице болх дӀаболабир моттига вахархочо баьча лоткъамах, цо яхачох цун хиннача фусам-нанас, енна йиӀиг а юкъе йолаш, алименташ доахаш хиннад цунгара ший берашта. Тохкама болх дӀахьош гучадаьлар, цун йиӀиг еннай аьнна даьккха каьхат долаш цахилар, из дийна йолаш санна лоархӀаш хилар. Цу тайпара, ца доагӀаш ийца ахча 450 эзар сом хилар.
Дукха дезал болча нанна духьала уголовни гӀулакх хьадийллад хӀилла лелаярах йолча статьях. Тохкама болх дӀахьоча юкъа, цунгара каьхат даьккхад мехкара араяргйоацаш.
