«Хьалхарчар Болама» доакъашхошта паспорташ дӀаделар
ГӀалгӀайчен МагӀалбика кхале, хьалхара паспорташ дӀалуш, кхетаче хилар дешархой, Россе «Хьалхарчар Болама» доакъашхошца. 14 шу даьннараш гулбелар кхален администраце актови зале, администраце кулгалхочун гӀонча йолча Иленаькъан Зейнапа, Россе МВД моттигерча даькъ тӀара миграцеца дувзаденнача хаттарех йолча отдела кулгалхочо, полице майора Хугоева Людмилас, иштта «Хьалхарчар Болама» кхален отделене кулгалхочо Барханой Фатимас уж тӀаийцар.
«Тахан шоана делар Российски Федерацен гражданина керттера каьхат-паспорт. Шо, 140 миллион совгӀа нах бахача мехка йизза бокъо йола доакъашхой да, тхона ловра ер ди шоана массаза дагалаттар.
Оаха даькъаладувц шо укх денца; могаш, аьттув болаш дахалда шо. Дукха безаш а лоархӀаш а хила шоай дай, боккхагӀбараш, вахара наькъ тӀа нийсхон тӀехьа хила. Шоаш боккхача мехка дай хилар диц ма де, цох доаккхал а де!» - уж дешаш аьлар боккхагӀчар кагирхошка.
