«Юртара лор» яха оагӀув хьаллоац вай мехка
Мехкарча хӀара моттиге эшаш бола лораш хургболаш, «Юртара лор» яха оагӀув ба вай мехка хьаллоацаш. Из хоам «Сердалога» бир Мехкадаь зарбан болх лелабераша.
«Цу оагӀонга гӀолла укх шера, Эккажкъонгий-Юрта, ГӀажарий-Юрта, Галашка, ЖӀайрахьа кхален юрташка, къахьегаш 13 лор ва. Уж ба анестезиолог-реаниматолог, эндокринолог, невролог, эндоскопист, иштта кхыбараш», - белгалдир вай мехкадас Келаматанаькъан Махьмуд-Ӏаьлас «Юртара лор» яхача программах дувцаш.
Из проект дӀахьоча юкъа, юрташка геттара чӀоагӀа эшаш бола 3000 совгӀа лораш балха оттабаьб вайцига. Ӏаьдало ахчанца дикка новкъостал ду цу наха. Вай бувцараш ба, 50 000 хиллал мара нах ца бахача юрташка болх бе, наха гӀо де раьза бола лораш.
Мехкадас белгалдир; шоашта эшача лора дӀатӀабаха, шоай лазар ма дарра цунга дӀадувца могаш боацарашта из чӀоагӀа лоархӀаме да, аьнна.
Юрташка болх бе дӀаухаш, шоай декхараш бехктокхаме дӀахьош бола лораш вай къаман юкъе лакхерча лагӀа тӀа хургба.
