ИнгГУ ВУЦ хургбола тӀема полице мугӀарера бараш а сержанташ а хьаийбу
ГӀалгӀайчен паччахьалкхен университета тӀема дешара центре студенташ хьаийбеш ба «тӀема полице сержант», «тӀема полице мугӀареравар» яхача говзалах, аьтинга бетта 30-ча денга кхаччалца, яхаш дийцар «Сердало» газетага мехка министрий кабинето.
«ТӀема дешара центре дӀахьош дола дешар (ВУЦ) ИнгГУ дӀалоархӀ эскаре хилара нийсса.
Дешар йистедаьнна, тӀема дув бенначул тӀехьагӀа, уж дӀаязбу РФ Герзашцарча низашта эшача хана тӀабехаргбарий мугӀарашка, сержанта е мугӀарерчун дарже. Иштта царна хьалу тӀема билет, цар бокъо я паччахьалкхен гӀулакха тӀа, бокъонаш лораерий балха отта», - аьлар университетерча хоамо.
Деша оттача яхье дакъа лаца безам бараша вуза ректора цӀерагӀа заявлени язъе еза. Цул тӀехьагӀа, царех хӀаравар чакхваргва профессионально- психологически даькъ тӀа тӀема-лорий комиссе беча хоржамах, ше тӀема г1улакха даязваь латтача моттиге. Цул совгӀа, физически кийчон боарам дӀачубала беза, цу юкъе да кхо километр вадар, кхыдола спортивни декхараш кхоачашдар.
Деша оттара яхьа юкъебаха йиш йолаш ба 1-ча курса бакалавриата, иштта 1-2-ча специалитета студенташ, цунна чуйоагӀаш я лорий факультет а. Цунах бола хоам бовза таро хургья ИнгГУ керттерча гӀишлон чу укх адресах: Магас-Шахьар, Заьзгакъонгий И.Б. пр. 7.
