Ленинграда моастагӀаша баь го бицбац вай мехка
Россе исторецара укх бетта 8-гӀа ди дега гӀайгӀа яхьаш да. 1941-ча шера, цу дийнахьа болабелар моастагӀий Ленинграда го бе. Шахьаре лаьттача халача, унзарча ханех дувцаш; кхетаче дӀайихьар Дола-Коарча культуран цӀагӀа.
«Го баьча хьалхарча денгара денз, цигарча бахархоша эзача халонах дийцар кхетаче. Цу бирсача деноша вӀашкабихьа ленинградхой моастагӀчунна духьала мишта лаьттар дийцар цига. Цу моттига хетаяь байташ йийшар бераша, массане дегаш тохадолийташ. Цу хана этта денош довзийташ йола документальни моттигаш гойтар цига, царга гӀолла массанена бӀаргадайра цига лаьтта сурт», - дийцар «Сердалога» Дола-Коарча культуран цӀенна кулгал деча Алерой Билала.
«ДӀадаьннар дицденнадац» яха тематически гойтам вӀашагӀбеллабар библиотекан болхлоша. Ленинграда баьча гонах дола исбахьален литература, исторически каьхаташ дар цига хьокха оттадаь. Ленинградера моастагӀа вохавеш духьаллаьттарий цӀераш дагалаьцар кхетаче, кхувш латтача тӀехьенна хьалхадаьккхар, цу деной истори довза дезилга.
