ГӏалгӀай мехка кхаь бетта 10 никъ тоабаьб
ГӏалгӀай Республикан машина наькъий Министерстве кӀимарса беттагара ардара беттага кхаччалца баьча балхах дийцар. «Вахара хьалаш» яхача къаман проекта чудоагӀаш, цу боахамо шийна декхараш тӀаийцар 12 машина никъ тоабе. Царех 10 йистебаьннаб.
Карарча шера тоаяьча лоархӀамеча моттигех ба ши никъ: Наьсаре-Шолже, иштта Оалкам-Тӏаргим-Чми. Царел совгӏа, белгалдир Шолжа кхален Эбарга-Юрта, МагӀалбика кхален СоагӀапченна тӀадолха наькъаш.
«Наькъий программанна чудоагӀаш да карарча шера дукхагӀа машинаш лела наькъаш, дукхагӀа наха тоаде яхаш дехараш даьраш. Керттера терко тӀайохийт наькъа кхерамзлен Ӏалашо яра. ЧӏоагӀа а дукха латтаргболаш а бола никъ ӏобиллача; наькъа такилгаш даьд, светофораш оттаяьй, наькъа белгалонаш а яьй, гӀашлой наькъий оасаш дахийтад, гонахьара наькъа оагӀонаш чӏоагӏъяьй. Белагалде деза, уж деррига балхаш лаьрхӀача ханал хьалха даь хилар, цо гӀад а вуг», - аьлар ГӏалгӀайчен машина наькъий, транспорта министра Хаматхананаькъан Батыра.
Белгалду, хӀанз дӀахьош ба 12 км Илдарха-Гӏала-Яндаре машина никъ тоабара болх, иштта Илдарха-Гӏалан тӀий а тоадеш да.
