БӀаьхбенна лаьтта 19 гӀишлон болх чакхбаьккхар мехка, укх тӀехьарча ялх шера
2019-ча шергара 2025-ча шерга кхаччалца, бӀаьхбенна лаьтта 19 гӀишлон болх чакхбаьккхар мехка. Цу гӀулакхо дӀалаьцар 2,3 млрд совгӀа ахча да, цу юкъера 900 млн сом федеральни оагӀонгара кхаьчад. Цох лаьца дийцар Мехкадаь зарбан болх лелабераша. Республикан кулгалхочо Келаматанаькъан Махьмуд-Ӏаьлас белгалдир, дукха халонаш духьаллаьттаяле а, лоархӀаме йола вахара оагӀонцара проекташ чакхъяха аьттув баьннилга.
«Къаьстта йоккха терко лоаттайир болх дӀабахьара, цу оагӀонца дувзаденнарашта. Федеральни оагӀоно новкъастал деш ишколаш, дарбанчеш, берий бешамаш хьалъеш бола болх чакхбаьккхар», - белгалдир Мехкадас. Баьча балха юкъе я СоагӀапчара, Кердача Редантера, ТӀой-Юртара, Илдарха-ГӀалий тӀара йиъ берий беш; Илдарха-ГӀалий тӀара, Магасера, Наьсарера кхо ишкол; Магасера, Наьсарера поликлиникаш. Иштта Шолжа шахьарера 300 саг дийнахьа тӀаэцаш йола поликлиника, Пхьилекъонгий-Юртара психоневрологически диспансер. Дешара, унахцӀенон оагӀонца наха болх бе 2,5 эзар совгӀа моттигаш хилийтар цу беркатеча гӀулакхо. Иштта хьалъяьй культуран оагӀонцара моттигаш: культуран цӀенош, Шолжа-Шахьарера гойтамий моттиг, Наьсарера ашарий ишкол, иштта тоаяьй «Аьрзи» яха лагерь. МагӀалбикера, Южнера, Кердача Редантера вӀаштӀардаь цӀенош тоадеш боккха болх чакхбаьккхар мехка. Белгалде деза, из беррига болх ханнахьа чакхбаккха аьттув цабалар ахчанца дувзаденна, из болх чакхбаккха дӀатӀаийцараша шоай гӀулакх бехктокхаме дӀацадахьар хиннилга. Цхьацца йолча гӀишлон балхаш чакхдоахаш хиннача моттигий кулгалхой гӀулакх тахан суде тохкаш латт, Ӏаьдала хӀама лечкъадарах.
