Федеральни оагӀонца лохаш хинна машин гучаяьлар вай мехка
04.09.2025 09:41
Федеральни оагӀонца Ӏаьдало лохаш хинна машин дӀалаьцар вай мехкарча полице болхлоша. «Маяк-11» яхача контрольни посте латтача мехкарча Росси МВД «МагӀалбик» яхача МО оагӀон болхлоша дӀалаьцар из машин.
«Сердалога» МВД болхлоша беча хоамах, цар теркам тӀаэзар «ВИС 23472-0000010» марках йолча машино. Лоалахарча мехкара 21 шу даьнна саг вар лоаллаш ваьгӀар. Каьхаташка хьажа айттача полице болхлошта гучадаьлар, из машин Ӏаьдало лохаш йолга.
«МагӀалбик» МО яхача Россе МВД моттига доазон тӀа дӀаоттяьй машин. Из лохаш хилара бахьанаш тохкаш да Ӏаьдал.
