Цо дихьад, бокъо йоацаш, 8,6 млн сом. ХӀанз укх сахьате из лаьца воалл.

«Бокъонаш лораеча моттигаша яхачох, цо 2019, 2021 шерашка, ше кулгал деча моттигаи иштта ше тӀахьожам лоаттабеча доалахьарча боахамаи юкъе, бокъонах ца боагӀаш бола ши бартчӀоагӀам баьб, доал деча даькъ тӀа эшаш йола гӀишло хьалъяра. Хьалххе а ховш болча, хьа ца баьча балхах администраци яр болхлошта цхьаннех 40,5, вокхох 65 млн сом дӀахьожаде дезаш , бакъда из ахча цун чота тӀа дацар. Из хьал дика довзаш, иштта заказчико ший декхараш кхоачашдаь ца хуле, из болх хьалбе безаш хинна лаьтта 20% подрядчика кхоачаш долга а ховш, цо эцара-дохкара бартчӀоагӀам кийчбир, цул тӀехьагӀа цу боахамга дӀабелар. 2023 шера балхара дӀаваьнначул тӀехьагӀа, из саг царех цхьан моттига керте отт. Цу тайпара зуламхочо, бокъонах доацаш, цхьаннахьара 2 811, вокхазахьара 6 333 квадратни метр дола лаьтташ карадерзаду, кхален бюджета 8,6 млн сом зе а деш», - аьлар «Сердало» газетага ГӀалгӀайче гӀолла йолча Россе МВД зарбан болх лелабераша.

Уголовни ши гӀулакх хьаделларах, зулам дар лоархӀ РФ УК 3 д. 285 ст. доагӀаш ма хиллара, зуламхо тохкама Ӏаьдало хьалаьцав. Этта хьал техка даллалца, из лаьца воалларгва.