ГӏалгӀай мехка «Заман поатрон» лаьттах еллар, Коталон 80 шу дузаш
Сийлахь-боккхача тӀем тӀа Котало яккхара 80 шу дездеш, ГӏалгӀай Республике гӀолла йолча Россе СК Тохкама урхаллене кхетаче хилар «Заман поатрон» лаьттах йоллаш. Из кхетаче дӀайихьар, Российски Федераце Тохкама комитета Ерригроссийски юкъарлон-патриотически болам хиларца дувзаденна, яхаш, дийцар «Сердало» газетага цу моттиге.
Кхетаче дӀайолаелар Магасерча тохкама урхалленгара. Кхетачен доакъашхошта дайзар Тохкама комитета истори, иштта Сийлахь-боккхача Даьймехка тӀема, СВО доакъашхой турпала гӀулакхех йола лекци йийшар.
Экскурси яьнначул тӀехьагӀа; къона эскархой, тохкама урхаллен эпсараш бахар МагӀалбик шахьаре, цига уж тӀаийцар тохкама ветеранаша.
«Сийле» яхача мемориала комплексе; тӀема, къахьегама сийлен музее «Заман поатрон» лаьттах еллар. Цун чухьнахьа дар хургдолча ноахалгара кхайкарал, тохкама урхаллен болхлой сурташ, каьхаташ, уж хьеделларгда ткъо шу кхы даьлча, Коталон бӀаь шу дузаш.
«Заман поатрон» лораергья музея йоккхача зале, из хетаяьй Кавказ, МагӀалбик лораеш лаьттача тӀема, Цо белгалду турпалхой денал, царна карагӀдаьннар доккха хилар.
