Наьсаре - Шолжа-Шахьар яха никъ тоабеш боахк мехка
5,75 км бола Наьсаре-Шолжа-Шахьар яха никъ тоабаь, йистебоалаш латт болхлой. Вахара хьал тоадарах йолча къаман проектага гӀолла дӀахьош ба из беркате болх.
«Сердалога» из хоам бир Минавтодортранса болхлоша. 7 метрага кхоачаш шербаьб никъ, шолха асфальтобетона йиллай, хий дӀаухаргдолаш турбаш яьхкай, иштта гӀашлой леларгбола никъ къоастабаьб. Карарча хана наькъашкара гӀармаш оттаеш, басарашца наькъа юкъе къоастам беш, лаьгӀвала везилга хойташ дола бӀоагӀилгаш оттадеш боахк болхлой. Уж балхаш йистедаьлча, никъ кийча ба.
«Дукха машинаш лелаш никъ ба из. Наькъа гаргаядача юрташкарча наьха хьал аттачахьа даргда хӀанз, иштта нохчий республике болхарашта а паргӀатагӀа хургья», - дийцар тхога машина наькъий гӀулакхех йолча Министерствонна хьалха латтача Хаматханаькъан Батыра.
Белгалде деза, укх шера вай мехка 42 км бола 11 никъ тоабе лерхӀилга.
