Юртара наькъаш тоадара хьалхара аргӏа чакхъяьннай
Юрташкара вахара хьал тоадеш, юрташка къахьегара кагирхой тӏаозаш, болх лоаттабу Паччахьалкхено. Цу гӏулакха йоаржаяь массехк программа я вай мехка, хӏаьта царна юкъе лоархӏаме моттиг дӏалоацаш я юрташкара хьал тоадарах йола программа. Цу оагӏонга гӏолла дукха беркате хувцамаш хиннад вай республикерча юрташка, юртбоахама моттигашта тӏадолхаш дола наькъаш тоадаьд.
«Цу юкъе ба 9 км болча «Кавказ» наькъагара Булгучанаькъан Борха Берта юртбоахама тӏабода никъ, ООО «АлМаВит Фрут» яхача моттига тӏабода «Заьзгакъонгий-Юрт-Мхьмад-Хитӏе-Мозда-ке» яха 1,43 км бола никъ, ООО «Тӏой-Юртарча теплицай моттига» тӏабода 3,8 км бола «Наьсаре-Терек-Долакха-Юрт» яха никъ, Гӏанажанаькъан Г.Х. КФХ тӏабода «Кавказ» - «Илдарха-Гӏала-Юкъера Ачалкхе - Гӏайрбик-Юрт» яхача наькъагара 440 м никъ, «Жӏайрахьера» ЗАО яхача моттига тӏабода «Заьзгакъонгий-Юрт-Горагорск» яха 22, 6 км никъ.
37 км кхоачаш никъ ба беррига а цу программага гӏолла тоабаьр», - дийцар «Сердалога» юртбоахама гӏулакхех йолча Министерстве.
