Теплицанна тӀабода никъ тоабеш болх дӀабихьар мехка
22.05.2025 10:19
«ТӀой-Юрт» яхача теплицаш йолча моттига тӀабодаш бола никъ тоабеш болх дӀабихьар вай мехка. Из хоам «Сердалога» бир Минавтодортранса зарбан болх лелабераша.
Цхьаккха тайпара тоабаь боацача наькъ тӀа гӀолла дӀатӀааха везаш хулар цу моттига хьалхагӀа. Шолха асфальтобетона никъ Ӏобиллар цига тахан, гонахьара моттигаш а тоайир, наькъашкара гӀармаш оттаеш, басарашца наькъа юкъе къоастам беш къахьийгар.
Юртара моттигаш тоаярах йолча паччахьалкхен программага гӀолла дӀабихьар из беркате болх. Белгалде деза, цу программага гӀолла, 2019-ча шера денз, мехка 30 км совгӀа наькъаш тоадаьлга.
