Ӏаьлий-Юрт- СурхотӀе хотташ бола никъ Ӏобилла баьннаб
Йиллача ханал хьалха шоай болх йистебаккха аьттув баьлар, Ӏаьлий-Юрти СурхотӀеи хотташ бола 4 км никъ буллаш баьхкача къахьегамхой. Из хоам тха газетага бир наькъий гӀулакхех йолча Министерствон зарбан болх лелабераша. КӀалхара тишбеннар дӀа а баьккха, керда никъ биллаб цига, хий дӀаухаргдола турбаш яьхкай, керда гӀармаш оттаяьй, басарашца белгало яьй.
«Из никъ воча хьале ба, яхаш, бахархой леткъа дукха ха яр. КӀоагаш дӀадукъаш беш хиннача балхо башха хӀама хувцацар. Тахан никъ боаггӀача боараме тоабаь латт, паргӀатта дӀа-хьа аха йиш йолаш», - аьлар наькъий гӀулакхех йолча министерствон хьалха латтача Хаматханаькъан Батыра.
Республикера наькъаш тоадара тӀехьа вӀашагӀъеллача паччахьалкхен программага гӀолла дӀабихьаб из беркате болх. 2025-ча шера кхы а пхи никъ тоабе лерхӀ цу программага гӀолла. Уж дола моттигаш я: Шолжа-Шахьар-Горагорск- МагӀалбик-Наьсаре-Терек-Долакха-Юрт яха моттигаш.
