«КӀалхарваккха Грут-2024» яха шоллагӀа яхь чакхъяьлар
Чиллан бетта оаха хоам баьбар, тиша каьхат гулдарах йолча яхье котбаьннараш бувцаш. Из цу яхьера хьалхара бӀал бар. Укх деношка кагирхой политикан, туризма Министерствос шоллагӀча бӀала жамӀа дир. ТӀеххьарча бӀала юкъе 11000 кг дукхагӀа гулдир тиша каьхат. Из хоам «Сердало» газетага бир из болх вӀашагӀбеллараша.
«Юкъарча дешара 12 ишкола 680 дешархо дакъа лоацаш хилар каьхат гулдеча, цо таро лу мехка экологи лорае. Доакъашхошта юкъе бар Магас-Шахьара, Илдарха-ГӀалан, иштта Яндарера, Пхьилекъонгий-Юртара, Буро кӀалхара, Долакха-Юртара дешархой», - аьлар кагирхой туризма Министерствон зарбан болх лелабераша.
Тхоца къамаьл даьчо яхачох, 4004 кг каьхат гулдарах котало елар Илдарха-ГӀалан №1 йолча ишкола. Яхье керттера дакъа лоацаш йолча ГӀалгӀай Республикан Ӏалама тароний, экологе Министерствос 30 000 сом делар цу дешара моттига.
ШоллагӀа моттиг йяькхар №1 йолча Буро кӀалхарча юкъерча ишколо (1785 кг), Долакха-Юртарча юкъерча ишколо (937 кг) кхоалагӀа моттиг яккхар.
Вайна гу, республикан кагирхой вахара дешаш кхоачашдеча дакъа лаца кийча хилар. Мехка экологически хьал тоадарал совгӀа, гонахьара Ӏалам лорадарах бола бехктокхам а совбоаккх цо», - аьлар ГӀалгӀай Республикан кагирхой политикан, туризма министра Малсаганаькъан Адама.
