КӀадаех ахча дӀа ца денна кхалсаг, полице кхаьчай
Ший фусам хоза кийчъе безам хиларо чӀоагӀа тийшаболх бир МагӀалбикерча, хӀама лочкъаярах шийна цхьаккха тайпара бехк бергбац мотташ хиннача, кхалсагá. Ший эгӀаяьча уйлаша кӀалйитар из. Тиканчас шийга хьажа хьаденна корага доададу кӀадаш, мах дӀа ца луш чу а дихьа, царца сакъердалуш дукха Ӏанзар зуламхо. Из йолча «хьоашалгӀа» баьхкар полице болхлой.
«Россе МВД «Малгобекский» МО, Россе ГӀалгӀай Республикера ВОГ из гӀулакх тохкаш болх дӀахьош йолча хана гучадаьлар, хьалха массехказа из санна долча гӀулакхех уголовни бехктокхаме ийзача моттигерча кхалсага, 2023 шера тушола бетта, тиканча тешаеш цунна дегӀалъяха, 22 эзар 400 сом доаккха Ӏоохкаш дола кӀадаш дихьа хиннад. Царех ахча дӀа ца а луш, дохкархочунцара бувзам хоадабаьб цо. Из бахьан долаш, ше бехке хилара мукӀарал деш, тӀаийцай из бокъонаш лораераша», - хоам бу «Сердало» газетага ГӀалгӀай чурча гӀулакхий Министерствон зарбан болх лелабераша.
