ДегӀа зе деш, сакхетам тувлбеш дола «дохьаж» дохка гӀийртар бехктокхаме эзай
ДегӀа зе деш, сага сакхетам тувлбеш йолча хӀамашца базар лелае еннар, Ӏаьдало ха теха, чуйоалл. Из хоам «Сердалога» бир МВД болхлоша. 33 шу даьннача яхархочун духьалара гӀулакх тохкаш хилар МагӀалбика кхален суде.
Белгалдечох, 2024-ча шера ший маьр-наьнаца цхьана, юхайохка лаьрхӀа кхыча нахаца хьалххе чӀоагӀдаь, сакхетам тувлабеш йола хӀамаш хьачуя вӀашагӀделлад цар. Ростоверча аптекера 1,2 млн сомах «Прегабалин», «Тропикамид», «Трамодол» яха дегӀа зе деш йола хӀамаш ийцай цар 3 кийла совгӀа», - йоах тхогарча хоамо.
Даьла къахетамца, из «дохьаж» дохка аьттув баьннабац зуламхой, ханнахьа оарцагӀбаьннача МВД, УФСБ болхлоша республике хьачуоттачара дӀалийцар уж. Деррига техкача судо, цу кхалсага леладеш зӀамига ши бер хилар теркаме лоацаш, ши шу ялх бутт ха техар цунна набахта ялла.
