«Юрта бюджете эшаш дола ахча ца хилар, нах шоаш оарцагIбувлаш тоаде дезаш хул токацара гIулакх. Иштта хьачуйила свет ма хетта дега тоам беш хилац. ХIетта нах баха хайшача моттигашка тахан даьржа да из гIулакх. ХIара энергетико кхетаду, оарц деха, харцача даьннар тоаде шоаш мара кхы веха саг цар воацалга. Цунга хьежжа, ток лоаттаеча кхуврча болхлоша шоашта могар ду наха гIо де.

Йоккхача проекташкара болх боацаш, нах баха хайшача моттигашка дукха хул оарцагIа ваха веза моттигаш. Токацара хьал тоаде тха яхаш дехар деча наьха къамаьл даьсса хабар лархIа йиш ярех дац», — аьлар тхога «Ингушэнерго» кхуврча кулгалдеча ТIоаршхой Рамзана. Проекта болх чакхбаьккхаб ала йиш йолаш да тахан. МагIалбик районерча из болх дIахьоча тоабас 1,5 км чулоацаш тока лини чуйилар 15 дикагIа дола аьшкцеманта бIоагIий догIаш.

Керда чубила аьшкасаьрг мукх буаш бац, оалхазараш IотIахайшача а царна зе дац, замыкани хилча цIи ювлаш бац. «Хала дар тхона. 90 Вольтал лакхагIа айлуш яцар тха цIеношкара тока напряжени. ХIаьта, эггара халагIа дар-м из дацар.... Харцахьа хьачутийсача тока аьшкасаьргех кхерар тхо, бераш дагадоахкар. ХIанзчул тIехьагIа паргIата са доаккхаргда оаха Даьла къахетаманца из бала дIабаьнна. Из АллахI раьза хилва тхона гIо даьрашта! Хоза йистхилар долаш, эздел, эхь, гIулакх долаш кагий нах бар укхаза баьхка энергетикаш.

Царгара гIо нийса дийха хиннад оаха», — аьлар Кердача Реданта бахархой болча ГIулой Ювсапа, Шадинаькъан Iаьлас.