«Лаьнанаькъан Ахьмад хьежар йоккха кхетаче дӀа мишта йода, дешарца ювзаеннача занятешка а хилар из, доакъашхошца къамаьл хилар цун.

ПхелагӀа ди да кхетаче йола, кагирхой ладувгӀаш хилар Тимакова Людмилас луча хьехамга, тема яр «СМИга гӀолла ший хӀама маьхалдаккхар» яхаш. «Ставрополерча берий Союза кулгалхочо, Къилбаседа Кавказерча неформальни дешара тренера Фарахманд Париса нейропсихологически упражненешка гӀолла эшаш бола хоам бир чура программаш дегӀайоалаяра хьакъехьа. Черри Алёнкас дийцар дикал йола интернет хьакхолларах, «Витамин С» яха хий арахецарах, цунах дикагӀа йола ролик яккхарах.

Режиссёра Гаврилов Михаила «Метаморфозы: уйлаш, сибат» яха хьехам бир, бера дагардар хьагойтара лаьрхӀа.

Кагирхоша кхоллама болх Ӏомабарал совгӀа, кхетаче дӀакъовлаш хургбола театра гойтам а кийчбир.

Из вӀашагӀделлараша яхачох, дукха кийчо яьчул тӀехьагӀа «Малх» яхача топпара хӀамаш кхоллача пхьоаллен скульптура хьайийллар. ГӀалгӀай Республикан бӀаргашта хӀама гуш боацача наьха Ерригроссе юкъарлонна чубоагӀача Овшанаькъан Мухьмада, Ӏатиганаькъан Беслана, «Азар» сурташ дехкача студе, иштта Пензерча топпарах хӀамаш еча Сайфутдинов Вахас хьакхелла яр из.

Гулбеннарашта чӀоагӀа сакъердаме хетаргбола никъ бар укхаза лехар. Ди йистедаьлар спортивни ловзараш дӀадахьарца, фильмага хьажарца.

«Со чӀоагӀа раьза ва, Ӏаьдала болхлоша вай хьаллоацаш. Къаьстта баркал оал аз Лаьнанаькъан Ахьмада, цо кагирхой иштта терко ярах, хӀана аьлча иштта барт хиларца мара укх тайпара болх дӀабахьа йиш яц», - аьлар кхетачен кулгалхочо Къулбужанаькъан Берда.