«Кхела доакъашхой бар ЦДТЮ говзанча Гетагажанаькъан А. (кхелахошта хьалхалаттар), Наьсарен района Iаьлий-Юртарча гимназе» эрсий метта, литературан хьехархо Угурчанаькъан Ф., дешара Урхаллен болхлой Дзовранаькъан Ф., Бохтаранаькъан З., Шаденаькъан Г. Дешархой яхье пхиъ котваьннари итт совгIати белгалдир.

Котбаьннараш: «Наьсарен № 5 йолча ишкола» дешархо Томбенаькъан Фатима. Цо дийшар «Наьна дог» яха Ю. Яковлева дувцар. Чуранаькъан Муслима йийшар Оалмазанаькъан Бориса «Мел вах дагадоагIаргдолаш» яха стихотворени. Из ва «Наьсарерча № 9 йолча ГБОУ дешархо. Шаденаькъан Софияс «Нана» яха А. Дружинина монолог йийшар, цо «Наьсарен-Шахьара № 11 йолча юкъерча ишколе деш. «Лицей-берий беш» ГБОУ дешархочо Марзенаькъан СаIида, «Ай, да Пушкин» яха Постников Валентина стихаш йийшар, ГБОУ «Магас-Шахьара дешара центра» дешархочо МежидовгIар Адама Джек Лондона «Мартин Идена» дакъа дийшар.

Бераша «Дийна классика» яхача вай мехка хулача даькъе дакъа лоацаргда.

«Сцена тIа араваьннача хана, эхь хетар сона, деша волавелча дIадаьлар из. Аз укх конкурсага кийчо ю дукха ха яр, Къоастой Мадина хьехамча а йолаш, из зехьа а довнзар», — аьлар цхьан доакъашхочо КIаценаькъан Дауда.