Кхелахой бар вайцига дика бовза нах: ГӀалгӀай Республикан культуран министр Лаьнанаькъан Залина, йоазонхой Союза кулгалхо Ноакастой Хаваж, культуран болхло Мартазанаькъан Муса, Россе журналистий доакъашхо Фридман Михаил, ГӀалгӀай Республикан культуран цӀихеза болхло Чаненаькъан Тамара. Мероприяти хозъеш декаш дар Гуцаранаькъан Микаила иллеш. Уж дӀааьлар цӀихезача иллиалархоша: «Боалий безам» яха илли дӀаоалаш вар ГӀалгӀай Республикан Хамхой Ахьмада цӀерагӀча Паччахьалкхен филармоне солиста Акхасаганаькъан Мовсар, «Гуйран безам» яха илли дӀааьлар вокалиста Харсенаькъан Марема, «Нана» — 1ьленаькъан Ӏайнас.

Дакъа лоацаш хиннарашта юкъе бар шоай байташ йийшараш а, царех яр «Дега хьамсара кӀант» яха байт йийша ГӀазданаькъан Милана, Таренаькъан Исроапила «Наьна мотт», Налганаькъан Илеза «Сага керттердар», Эккажанаькъан Розас «Малий со», «Лоам тӀехьашка», Балханаькъан Жабраила «Ираз» яха байташ йийшар, — йоах хоамо.

Яхье дар литературан тайп-тайпарча жанрех дола балхаш. Культура министро белгалбир Наьсарен района Ӏаьлий-Юрта «Гимназе» ГБОУ дешархочун Албохчанаькъан Аминай болх «Сахьатах йола баллада», ворхIлагӀча класса дешархочун Пхьаранаькъан Раянай  «КӀай боа».

Яхье котваьлар КӀаценаькъан Дауд, Ибрагимова Раяна, КӀаценаькъан Самира, ГӀазданаькъан Милана, Балханаькъан Жабраил.

«Вайна наха сатувсачул дуккха а дукхагӀа хӀама карагIдаргда, цу гӀулакха эшар да вай хьаллацар, цудухьа доккха баркал оал аз Гуцаранаькъан Микаила, цо вайна новкъостал дарах», — аьлар Лаьнанаькъан Залинас.