«Сфорцандо» ГIалгIай Республикан культуран Министерствос хьаллоацаш я, хIаьта из вIашагIъеллар ГIалгIай Республикан искусствай керттера ишкол я.

Кхелахой доакъашхо я Российски Федераце цIихеза артистка Черных Маргарита, Минеральни Воды яхача шахьара В. Сафонова цIерагIча Ставрополерча мехка ашарий колледжа лакхарча категоре хьехархо Прокопьев Анатолий, Ростоверча С. Рахманинова цIерагIча паччахьалкхен консерваторе зIамигача ансамбла кафедра профессор Рукин Александр, ГIалгIай Республикан искусствай керттерча ишкола кулгалхо Долакханаькъан Зара; ГIалгIай Республикан искусствай колледжа хьехархо Къоастой Аслан. Яхье дакъа лоацаш хилар Илдарха-ГIалан искусствон берий ишкола, ТатаевгIар Вахий цIерагIча ЧГККИ, ГIалгIай Республикан Наьсарерча искусствай керттера ишкол, Терек- Шахьара искусствай берий ишкола, Буро тIара искусствай берий ишкола дешархой.

Культуран министр ше цига хила таро йолаш яцар, цудухьа цун цIерагIа дола къамаьл дийшар яхь дIахьочо: «Укх диъ шера «Сфорцандо» яха къонача концертмейстерий регионашта юкъера яхь мехка культурни оагIув хинна дIаэттай. Цо гулбу ший майдан тIа Россе тайп-тайпарча миIингашкара ашарашца безам бараш. Бахьан из долаш, вай таро хул начIал долча иллиалархошка ладувгIа. Уж, шеко а йоацаш, кастлуш классически ашарий седкъий хинна дIаоттаргба, хIаьта кагийбарий таро хургья яхьашта юкъебаха», — белгалдаьккхад ГIалгIайчен культуран министра Лаьнанаькъан Залинас.