Укх деношка, журналист волча Чахкенаькъан Iаьлас Магасе дIайихьар, интернет-платформа, блог, кхыйола социальни оагIонаш нийсса лелае Iомабеш йола семинар. Из накъадаргда, къонача блогерашта, пресс-секретарашта, смс-менеджерашта шоай болх хила боаггIача боараме дIабахьа. Лекцех, практически балхах латташ яр семинар. Дуккха кердадараш Iомаде аьттув бар цига къонабарий», — дийцар тхога кагирхой гIулакхех йолча комитете. «Цу балха юкъе белгалде деза лоархIамедараш- бакъдари наха эшашдари. Хоамаш керда хила деза; наьха деша, довза безам хургболаш.

Таханарча дийнахьа, социальни оагIонашка дукха моттигаш я, бакъдар кегадеш, наха харцахьа дIадувцаш. Цудухьа, эггара хьалха, хоам тахка беза, боккъонцадар хайча мара нахалбаккха йиш яц. Харцахьара хоамаш, бакъдоацараш доаржадар, геттара даьржаш доагIа во гIулакх да тахан», — дийцар Чахкенаькъан Iаьлас.