Хьаьшашта дайзар цIихезача турпала вахарера гIулакхаш, бера хана денз тIема летчик хила ловш из хьалкхийнилга. Театре гойтар, цун новкъосташа из вувцаш даь къамаьл:

«БIаь шера цкъа мара нийслуц вахара наькъ тIа уж тайпара нах. Дика новкъост, ший цIен дика да волаш, чакхваьлар из». — «Аз доаккхал ду из саг сайна вовзарах.

Берригача мехко доаккхал де дезаш къонах вар Сулумбик. Нах кIалхарбаьхар цо, ший вахара уйла ца еш. ЦIен-нана, дезал, цунга хьежаш боккха мохк болаш саг ма варий из! Денал эшаш хIама да цо даьр!», — яхаш, хозача дешашца дагалувцар новкъосташа Сулумбик.

ЧIоагIа кIаьда, дикалах дизза дог долаш, саг вар из. Из хьахьокхаш дар, цкъа поликлинике ваха волаш, цо гойта ший дегIацара хоза гIулакх. Поликлиникерча болхлошка моаршал хаьтта ца Iеш, цу чу мел хиннача хIара сагага йистхулаш чакхваьлар из. ЧIоагIа цецбаьннабар нах эздийча гIалгIачо гойтача хозача гIулакхах.

Театре гулбеннабар Сулумбика гаргара нах, из вовзараш, везараш. «ХIаране дег чу, сийдола саг волаш, ваха висав из. Цун дега йIовхал хоалуш я цо хьабена вахара никъ тахка эттача», — аьлар театра актриса йолча Харсенаькъан Марема.

«Вай массане теркалбе безаш никъ ба цу сага хьабенар! Иштта денал долаш хиннача сагагара масал цаэцар эхь да вай кагирхошта. Вай къаман дукха ба сийдола турпалаш! Кхувш латтача тIехьенна бовза беза къаман эздий къонгаш», — дийцар сценарий вIашагIъеллача актёра ТIоаршхой Лом-Iаьлас.