«Эггара наха сатувсаш йола, дукха хьийжа спектакль гойтар ГIалгIайче. Дуккха а хьалхагIа ийца даьннадар билеташ.

Спектакль йистейоалаш, актерашта дукха тIоараш детташ, зизаш телаш, сий деш йола моттиг яр», — аьлар ГIалгIай Республикан РГМДТ зарбан болх лелабеча Султиганаькъан Iарбе.

«Пхи шу совгIа ха яр со из спектакль го безам болаш йола, юххера а сона хетар кхоачашхилар. Сона чIоагIа дукха деза Базорканаькъан Идриса «Боадонгара» яха роман, из эггара сона дукхагIа веза йоазанхо ва. Из хоза оттаяьяр аьлча, цхьаккха ца аьннар санна да. IотIадаха хIама ца эшаш, актёраша ловзаю ролаш, цу ханара вахар гойташ оттадаь гонахьара вахара сурташ мах баь варгвоацаш сов дика дар, цул совгIа, уйла яйташ йола моттигаш а яр цу юкъе дукха. Вела а велха а безам болаш йола моттигаш нийслора, цхьайолча хана бIаргара хий юха ца озалуш а хулар», — дог айденна дувц спектаклага хьежача Оалмазанаькъан Мартас.