«БаркалАларах» яха проект керте оттаеш, дIадихьар из беркате гIулакх. ВIашагIкхетара кулгал деш яр ГIулой Амина. Медиаволонтерство яхача балха юкъе чудоагIараш тохкаш, доашхаш ха дIайихьар цар. Сайташка гIолла медиафайлаш кхолла, цхьаццадараш тоаде Iомабир гулбеннараш.

Лекци йистеяьлча, пхи-пха сагах латтача йиъ тоабанна бекъабенна, де дезарий хьакъехьара белггала болх дIабихьар доакъашхоша. Кагирхой гIулакхах йолча комитета кулгалхочунгара Малсаганаькъан Адамгара интервью ийцар хьалхарча тоабо, юхебисараша ха дIайихьар, республикерча КДМ оагIон кулгалхошца къамаьл деш.

ХIара тоабан доакъашхоша лакхача боараме дIабихьар шоай болх. «Вай республике ма хетта даьржа дац из гIулакх тахан. Иштта дIакхухьача программаша дикка гIо ду начIал долча кагирхошта шоай гIулакх дIахьо, пайда боаржабе», — аьлар кхетачен доакъашхочо Солтамаканаькъан Арсмака.