« — Цига дакъа лаца бийхабар Афганистана ветераний Российски Союза моттигерча отделене кулгалхо МутаIаланаькъан Гурсман, ГIалгIайчен Iаьдала болхлой, юкъарлонна доакъашхой, бокъонаш лораяра йолча моттигий болхлой, шоай балха декхар кхоачашдеш байнача Iаьдала болхлой дезал, иштта ГIалгIай Республикан Iилман, дешара министерствон викалаш.

Кхетаче дIайолайир 2004 шера цу къизача бус а шоллагIча дийнахьа а хинна терроризма унзара гIоз а цар карагIа байнараш а дагабохаш. Гулбеннарашта го йиш йолаш бар Эккажкъонгий-Юртарча культуран цIен дешархоша ТIоалданаькъан Раянас, Хьавас, Саккхаланаькъан Ясминас, ТIоалданаькъан Иризас, Албохчанаькъан ХIажара кийчбаь суртий а иштта книжкай а гойтам. Цига иштта йийшар оазархочо, иллеш яздархочо БIарахой Мадинас язъяь «РОВД соахка» яха хоза байт. КIоарга чулоацам болаш яр «Уж лелхараш» яха КIанташанаькъан Заремас язъяь байт, из йийшар Саккхаланаькъан Ясминас. Кхетачене къамаьл дир Наьсарен кхален кулгалхочо Исмейланаькъан Iамархана, Эккажкъонгий-Юрта кулгалхочо Йовлой Микаила, ГIалгIай Республике гIолла йолча МВД (ОРЛС) болхлошца къахьегаш волча Батайнаькъан Мухьмада, Наьсарен кхале гIолла йолча Россе ОМВД кулгалхочо Хамхой Iийсас. Цул тIехьагIа «Назам» яхача дин викалий тоабанна хьалхалаттача Iажанаькъан Хьасана дуIа дир байнарашта тIера, мовлат а дийшар», — аьлар хоамо.

Эккажкъонгий-Юртарча культуран цIагIа дIахьош хиннача байнарех болча дагалоаттама кхетачене дакъа лоацаш хилар цар гаргара нах: веннача милице прапорщика Къоастой Ахьмад-Башира фусам-нана Къоастой Лариса, лийца нах чубехкача изоляторе беча балха тIа волаш веннача Кхоартой Iаьлий фусам-нана Кхоартой Хьава, Наьсарен кхален ОВД кулгалхочун гIонча, милице воккхагIвола оперуполномоченни ГIогIанаькъан Мухьмада фусам-нана Котанаькъан Макка, Наьсарен кхален ОВД кулгалхочун гIонча хиннача Кхоартой Адама воI Зубайра.