«Тушола бетта ткъаь бархIлагIча дийнахьа Наьсарерча Тутайнаькъан Аьсета цIерагIча урамах долча, Узбекистана бахархой чуIеш хиннача цIагIа газ ийккхай. Из бахьан долаш, пхе сага зе даьлар. Уж сихонца РКБ реанимаце хьалчубигар.

ГIалгIайчен Халкъий Ассамблейна керте латтача БIарахой Мадинай новкъосталца, Узбекистанерча посольстве из хоам дIабахьийтар. Юкъарлон культурни болхлочун кхайкарала оарцагIбаьлар Паччахьалкхен Думан депутат БIарахой Бек-хан, Ерригроссе Москверча узбекий конгресс, журналистика даькъ тIа юкъарлон хьашташ кхоачашдер, иштта социальни программа, культура, спорт дегIайоалаяра йола Малсаганаькъан ИбрахIим керте латта ганз», — аьлар хоамо.

Белгалду, ГIалгIайчен республикански больнице шоашта могар деш ба, цу наьха могашал меттаоттаеш, уж бовргбоацаш, бахаргбар хьадеш.

«Хаттар эттадар, Ташкенте из хоам дIакхачийтара хьакъехьа. Цунна юстара ца бусаш, къахьийгарашта баркал оал аз. Къаьстта баркал оал реанимаце отделенена кертте латтача Осканаькъан Марета, цо ший ханнахьа из хоам барах, Ташкенте из дIакхачийта таро хилар. Дукха цхьан мехка даьха къамаш хиларах тарра, воайла эшача новкъостал деш, хьадаьхкад вай массаза а, цхьа дезал санна дахаш а хиннад. Из доацаш а, Далла хьалхашка вай декхар дар царна оарцагIдалар, хIара бусалба сага тIадилла а да, хьайна уллуврачунна эшача оарцагIвалар», — аьлар ГIалгIайчен Халкъий Ассамблейна керте латтача, Эккажкъонгий-Юртарча культуран ЦIен кулгалхо йолча БIарахой Мадинас.