Тайп-тайпара хIамаш хьаеш вола 38 говзанча гулвелар Наьсаре. Царна юкъе бар тIоарсках, дахчах, топпарах хIамаш хьаеш бола пхьараш, цул совгIа, гизгаш хьаераш. Ярмарка дIаяхьа гIо даьраш бар, бIаргса эшаденнача юкъарлен болхлой.

Къоастой Савдас аьнначох, иштта йола кхетаче дIахьош, дикка ахча дIадода. Цудухьа чIоагIа лоархIаме хул моллагIа дола новкъостал. Из гIулакх массахана говзанч волча Iатиганаькъан Беслана леладу. Блогераш, спонсораш оарцагIбоахаш, болх дIахьу цо.

«Топпарах хIамаш хьаеча «Малх» яхача моттига лов, ярмарке дакъа лоацаш кхыча мехкашкара нах хилар. Хьалха ярмарка дIахьоча хана, геттара хала хьийзар тхо, пандус йоалла гIишлон кIалхара моттиг лохаш. Из геттара лоархIаме да, дегIа могашал эшаеннача наха. ЧIоагIа тоам хул сона, шоаш ехкача хIамаех говзанчаша дувцаш хилча. Нах цар хIамашта раьза хилча, болх дикагIа дIабода цар», — дувц из пайдане кхетаче вIашагIъеллачо.

«Итт шу совгIа ха я, аз гизгех хIамаш хьаю, пхи шу да, догам дехкаш, къахьега. Со укх тайпарча моттиге хьалхара кхаьчай. Сайна дика нах бовзарга, айса даь балхаш наха хозахетарга сатувсаш яр со, хьайоагIача хана. Аз сатийсача беса, дIадахар деррига. ЧIоагIа дега тоам хилар сона, укхаза кхачарах», — дийцар ГIаьбартой-Балкхарой мехкара енача Василенко Юлияс.