Цо дехар дир, ший йоӀ ИнгГУ бюджетни отделене деша оттае новкъостал де, аьнна. Цун дехар кхоачашде эттар ганза лаьрххӀа йола болхло Беканаькъан Фатима. Цун из вӀаштӀехьа а даьлар. СВО доакъашхочун йоӀах исторически факультета студентка хилар.

«Вай майрача бӀухочун фусам-нана Къамурзой Хади ший цӀендаьца пхи бер кхедеш я. ВоккхагӀа вола воӀ ший даь ларах дӀавахав, из хӀанз Даьхен гӀулакх деча ва. Из ва Михайловски тӀема артиллерийски академе курсант. Сона чӀоагӀа дика хет цар йоӀ деша оттае вӀаштӀехьадаьнна», - аьлар «Сердало» газетага Беканаькъан Фатимас.

Белгалду, федеральни оагӀорахьара деш дола новкъостал доацаш а, ГӀалгӀайче лаьрххӀача операце дакъа лоацаш болча бӀухой дезала гӀо ду.

ГӀалгӀайчен бахархоша, Ӏаьдало доаккхал ду вай турпалхоех; денал долаш, Даьхе лораяра декхар дизза кхоачашдеш латтарех.