«Виноградовски дешар» дIахьоргда паччахьалкхен университете
ГIалгIай паччахьалкхен университета филологически факультете «Виноградовски дешар» дIахьоргда. Филологически Iилманца дувзаденна истори, керттерадараш дувцаргда цIихезача литературоведа, лингвиста, академика Виноградов Виктора хетаяьча конференце.
«Iилман-практически конференци дакъа лоацаш хургба Iилман-педагогически, Iилман болхлой, ишколашкара хьехархой, культуран болхлой, аспиранташ, студенташ.
Университета керттерча корпусе, кхоана нийсса ши сахьат даьлча, йолалургья конференци», - дийцар «Сердалога» университета зарбан болх лелабераша.
Эрсий метта истори, грамматика, лексика, эрсий йоазанхой мотт, текстологи, лексикографи, историографи тохкаш балхаш леладаьд Виноградов Виктора. Ленинградерча, Москверча университетий профессор хиннав из, МГУ эрсий меттах йолча кафедранна керте лаьттав, метташ тохкаш йолча СССР АН института, эрсий метта СССР АН института кулгалхо хиннав, меттаца дувзаденнача хаттарех долча журнала керте лаьттав.
Эрсий метта, литературан тохкамашта хетадаь да Iилманхочун керттера балхаш.
