Инаркъе хьалъяьй 540 моттиг йола ишкол
«Дешар» яхача къаман проекта чуйоагӀаш, МагӀалбика кхален Инаркъе хьалйир, 540 моттига лаьрхӀа керда ишкол. Кхо гектар долча лаьттан тӀа кхозза вӀаштӀара яь гӀишло хьалъяь яьлар. Ишкола коа, юххьанцарча классашка деша дагӀа берий ловза йиш хургйолаш, моттиг тоаяьй. Иштта футболах ловза моттиг я, адара дола наькъаш даьхкад, кхыдола дика хьалаш Ӏалашдаьд.
«ГӀишлон чухьа дӀачуваьлча, йоккха холл я. Барзкъа хьалъолла моттиг кийчъяьй, цул совгӀа, кхача кийчбеш йола, хӀама даара йола моттигаш а йистеяьнний, хоза кулг теха. Йоккха, сийрда классаш я; библиотека, лорий блок, хьехархой кабинеташ я. ГӀишлон чу лифт я», - аьлар «Сердало» газетага ГӀалгӀайчен гӀишлошъеча Министерстве.
Из ишкол моттигерча гӀишлошъяра Министерствога гӀолла хьалъеш хиннар я «Стройгрупп-Идеал» яха фирма. ГӀишло хьалъе дӀайолаяьяр 2022 шера, цунга дӀадахар 586 миллион сом.
Белгалду, дӀадахача шера Инаркъе цхьаькха 720 моттиг йола ишколъяь хилар; цул а совгӀа, кхы а цхьа шу хьалха хьалйир 220 моттига лаьрхӀа берий беш. Керда гӀишлош хьалъеш хиларал совгӀа, Инаркъе капитальни ремонт еш, хоза таоеш латт дукха моттигаш. ДӀадахача шера укхаза цӀенхаштта тоадир культуран цӀа .
Даим кердайоаккхаш йоагӀа Инаркъе, цудухьа цу юрта бахача наьха вахара хьалаш а цунца цхьана тоалуш доагӀа.
Цар таро я шоай берашка дикача хьалашка дешийта, иштта берашка салоӀама ха дика дӀаяхьийта.
