Коталон Ди хьатӀаотташ, берашца кхетаченаш дӀакхухьаш ба СВО ветеранаш
18.04.2025 11:59
Ишколашка берашца кхетаченаш дӀакхухьаш ба тӀема операце доакъашхой. Из хоам «Сердалога» бир цу гӀулакха хьалхалаттараша.
«ТӀема операце доакъашхой Магасерча «Марем» яхача гимназе дешаш долча берашца кхетаче дӀахьош, тӀема аренашка шоашта дайнарех, лайнарех дувцаш хилар, «Даьхен гӀулакха латтар» яхача проектага гӀолла. Къаьстта йоккха терко тӀайохийташ дийцар моллагӀа саг Даьхен гӀулакха ураотта кийча волаш, яхь лораеш, денал долаш хила везилгах», - йоах хоамо.
СВО доакъашхоша теркалдечох, хьатӀадоагӀаш долча Коталон доккхача цӀайно кхувш латтарашта хьалхадоаккх вай къаман бӀухой Сийлахь-боккхача Даьймехка тӀем тӀа майрал, денал, турпалал гойташ чакхбаьннилга, цар цӀераш массахана дагалоаттае езилга.
