Илдарха-ГӀалий тӀарча № 7 йолча ишкола тӀабода никъ тоабеш боахк
№ 7 йолча Илдарха-ГӀалий тӀарча ишкола тӀабода никъ тоабеш боахк шахьаре. Цигарча ганза ахчах дӀахьош ба из болх. Асфальт буллаш, Мехкахдаьха 70 шу яхача урам тӀа 570 метрага кхоачаш гӀашлой никъ тоабеш, ишкола наӀарга машинаш Ӏоувттае доазув къоастадеш болх ба проектага гӀолла кхоачашбе безар. Дешархошта, цар даьшта, хьехархошта паргӀата, кхераме доацаш наькъаш хилийта, аьнна, из декхар тӀадиллар ва мехкада Келаматанаькъан Махьмуд-Ӏаьла.
«Машинаш сиха леларгйоацаш, кхера буллаш боахк болхлой карарча хана, из гӀулакх йисте даьлча, болалургба асфальтабетона никъ билла.
Машинаш Ӏоувттаергйола доазув а къоастадаьд. Белгалде деза, хьалхагӀа, къаьстта догӀаш латтача хана, цигара наькъаш геттара воча хьале хулаш хиннилга. Шахьара администрацена кулгал деча Дидиганаькъан Ахьмада тӀахьожам беш, дӀахьош ба из болх», - дийцар «Сердало» газетага цигарча къахьегамхоша.
Укх бетта 25-ча дийнахьа йистебаьнна хила безаш ба болх. ГӀадвугаш да, ишкола наӀар тӀара хьал дӀадахача шера хинначул дикагӀа хургхилар.
