Илдарха-Гӏалий тӀа могашал меттаоттаяра отделени хьайийллар
Илдарха-Гӏалан дарбанчен даькъ тӀа, могашал меттаоттаю отделени хьайийллар, цига хала лазараш долча, заӀапхой болча наьха таро хургья амбулаторегара тӀехьара тӀа лорий новкъостал лоаттаде, яхаш, дийцар «Сердало» газетага ГӏалгӀай Республикан унахцӀенон Министерствон зарбан болх лелабераша.
Ше къамаьл деш, ГӏалгӀай Республикан унахцӀенон министра Ӏалбаканаькъан Зарас белгала ма дарра, из хьаелла таро хилар «Могашал дика меттаоттаяра дола лорий новкъостал» яха федеральни проект хиларах, цо тӀахьех хала лазараш дола унахой берзабе эша лорий хьалаш лоаттадара.
Из проект хиларах, моттигерча лорий центрашка таханарча заман гӀирсаш лоаттаду, цар могашал дика меттаоттае таро лу.
«Могашал меттаоттаяра лораша деш долча новкъостало дикка дакъа дӀалоац, неврологе е човнаш хинна болча наха дарба деча. Керттердар да, хӀанз из лорий новкъостал ший хьамсарча шахьаре, ше вахача моттиге деш хилар. Из геттара чӀоагӀа эшаш да лаьрххӀача тӀема операце доакъашхошта, могашал меттаоттаяра дарба де дезаш хул уж», - аьлар Ӏалбаканаькъан Зарас.
Кердача отделене эггара дикагӀа дола гӀирсаш латт. Деррига лораша наха ду гӀулакхаш мах боацаш хургда.
