Илдарха-Гӏалий тӀа белгалдир Даьймехка турпалхой Ди
ГӏалгӀайче белагалдир ханорга тӀара лоархӀаме таьрахь - Даьймехка турпалхой Ди. Цунца дувзаденна Илдарха-Гӏалан №1 йолча юкъерча ишколе хьайийллар Дзовранаькъан Бембулата, Ӏажанаькъан Мухьмада цӀерах «Турпалхочун парта», яхаш, дийцар «Сердало» газетага «Даьхен лорабой» ганза гӀалгӀай филиала кулгалхочун гӀончас Джанхотанаькъан Мадинас.
«Турпалхочун парта» хилар бахьан долаш, дешархой таро хилар Даьхен хьашташ кхоачашдеш бейнача бӀухой вахар а тӀема гӏулакх а довза. Ше къамаьл деш, дешара моттига кулгалхочо Чӏасанаькъан Заремас, иштта ганза вахара болх лелабеча Темарханаькъан Ӏийсас, Чиймарзанаькъан Марема, хьехархоша белгалдир ЛаьрххӀача операце доакъашхоех болча дагалоаттама лерхӀам боккха хилар, Даьхенцара безам хила безилга. Бераша шоай аргӀагӏа из цӀай хоздир тайп-тайпарча халхарашца, иллешца, дукхагӀча даькъе Даьхенцара безам хестабеш дар уж», - аьлар хоамо.
Беза хьаьший болаш Илдарха-Гӏалан №1 йолча юкъерча ишколе бийхабар бейнача бӀухой дезал, тӀема ветеранаш Хазанаькъан Ӏаьла, Дзовранаькъан Исроапил, Темарханаькъан Амиран, Хьаьшанаькъан Руслан, Махлой Микаил, Горсовета, моттигерча администраце викалаш.
Кхетаче чакхйоалаш, хьаьшашта дагалоаттама совгӀаташ делар.
