Илдарха-ГӀала дегӀакхувлара проект йоаржаеш ба
Шахьара хьал тоадеш йола проект я, тахан Илдарха-ГӀалий тӀа дӀахьош. Из хоам «Сердалога» бир гӀишлон балхех йолча Министерствос.
«Хьакъоастадаь ахча 260 миллион сомага кхоачаш да. Проектага гӀолла кхоачашде дезарашта юкъе да 15,5 км кхоачаш дола инженерни оагӀонцара балхаш, хий чудиллар - 4 885 м, хий дӀа-хьа дохийташ йола моттиг - 4 660 м, догӀан хишта лаьрхӀа хьалъеш йола моттиг 5 995 м. Иштта ше-ший аргӀагӀа, 2027-гӀа шу тӀакхачале 18, 6 эзар кв.метрага кхоачаш таханарча ханага хьежжа дола цӀенош да цига хьалдотта лерхӀаш», - йоах тхога бенача хоамо.
Белгалде деза, цу оагӀонцарча къахьегамхоша Магаса, Шолжа кхален моттигашцара агломераце хӀама къоастадеш, из болх кӀоарга уйла еш, деррига теркаме лоацаш вӀашагӀбеллалга. Республикерча моттигий хьал тоадеш бола боккха болх ба из.
«Берий бешамаш, ишколаш, поликлиника йоацаш, проекто чулоац шахьарера культуран цӀа - кхетаченаш дӀакхухьаш, кхоллама оагӀонцара балхаш доаржадеш йола моттиг», - дийцар тха газетага.
Беррига болх чакхбаьлча, бахархой дог гӀоздоаккхаш хургья уж моттигаш.
