Ӏадсаькх кхоссарах йола 3D яхь дӀайихьар Илдарха-ГӀалий тӀа
Ӏадсаькх деттарах йола 3D яхь дӀайихьар Илдарха-ГӀалий тӀа «Дзурдзук» яхача спорта клубо. Из хоам «Сердалога» бир моттигерча администраце зарбан болх лелабеча МутаӀаланаькъан Мадинас. «Шахьара 30 шу дизара хетаяьча кхетаче дакъа лоацаш вар 40 маӀа саг. Вай мехкара, нохчашкахьара, селашкахьара, Ставрополера гулъеннача тоабаша шоай говзал гойтар цига. Цу яхьашца сакъердалуш бар уж», - дийцар тха газетага.
«Олимпик» яхача оагӀонца котало Кадиев Ахьмада яьккхар, шоллагӀча моттиге хилар Султиганаькъан Урусхан, хӀаьта кхоалагӀча лагӀа тӀа ваьннар Барзаев Адам вар.
«Блочни Ӏадсаькх» яхача оагӀонца котало ГӀайтакханаькъан Аслана яьккхар. ШоллагӀа, кхоалагӀа моттигаш Саламбиев Исламага, Бекботанаькъан Джамалага кхаьчар.
«Лонгбоу» яхача оагӀонца эггара толашагӀа хиннар Султиганаькъан Мухьмад-Башир вар, коталонга кхача гарга хиннарех вар Матенаькъан Або-Бакар.
ХӀетта ловза болабеннарашта юкъе белгала вар Абдурахьимов Надирбек, шоллагӀа моттиг кхаьчар Алиев Зулкифага, кхоалагӀча лагӀа тӀа баьлар Ножаев ИсмаӀал, Цхьорой Ӏамархан.
15 шерга кхачанза долча берашта юкъе толашагӀа ва, аьнна, кхайкавир Ахмадов Юсуф, шоллагӀча, кхоалагӀча моттигашка эттараш - Манкаев Аль-Ахьмад, ЦӀечой Ахьмад.
10 шерга кхачанза бараш а дикка белгалдаьлар цига. Йовлой Адама елар хьалхара моттиг, шоллагӀа моттиг - Абдурашидов Муслима, кхоалагӀъяр - Абдурашидов Ӏаьланна.
«Баребоу» яхача оагӀонца дошув ТӀонганаькъан Ӏисайга кхаьчар, дотув ЦӀечой Мухьмада дӀадихьар, кхоалагӀча моттиге Баркинхой Мовлдин вар. «Шира Ӏадсаькх» яхача оагӀонца Индербаев Шамала яьккхар хьалхара моттиг, шоллагӀча моттиге - Кадиев Ахьмад, кхоалагӀа Денибеков Ильяс хилар. ХӀаьта «Инстинктив» яхача оагӀонца эггара толашагӀа ва аьнна хьакхайкавир Гаджибангандов Мухьаммад, цунна тӀехьа хилар Тутайнаькъан Адам – шоллагӀа моттиг, Баркалов Асхьаб – кхоалагӀа.
