«Заьзганаькъан Идриса цӀерагӀча шахьара Керттерча стадиона тӀа, Илдарха-ГӀалан бахархой хьех, 2024 шера аьтинга бетта 18-ча дийнахьа, сакъердамеча яхьашка дакъа лаца, уж хетаяьй Ид аль-Адха (ГӀурба) деза денош хилара.

Уж яхьаш вӀашагӀъехкар я Илдарха-ГӀалан администраци, эшача кхоачамца уж хьаллаьцар АЗС M-GӀ Petroleum яха моттиг я», - йоах хоамо.

13 сахьат даьлча дӀайолургйолча яхьашка дакъа лоацараш 7 даькъа бийкъа хургба. Цу юкъе да «Кавказа хьисап», маӀача наха юкъе 100 метр, 15 шу даланза барашта юкъе 50 метр адар; Ӏовижа кулгаш тӀа хьалъийвалар, кхера айбар 90 кг, берашта а маӀача наха а юкъе ший дегӀ турника гӀонца ийдар, 18 шу даьннарашкара дӀаболабенна.

Котбаьннарашта совгӀата устагӀа лургба, шоллагӀа моттиг яьккхарашта-5000 сом, кхоалагӀча моттигах - 2000 сом.

Берригача доакъашхошта, хьажа баьхкача наха дика самукъадалар хургда, цӀайна хозал хоалуш хургья.