Вахар хаьдача СВО шин бӏухочунна хетаяь «Денала Парташ» хьайийллар Илдарха-Гӏалий тӏа
Тӏема аренашка вахар хаьдача СВО операце бӏухошта Гӏантамаранаькъан Темарлана, Медаранаькъан Адама хетадаь «Денала Парташ» хьаделлаш кхетаче хилар шахьаре. Из хоам «Сердалога» бера «Даьхен лорабой» яхача ганза болхлоша.
«Кхетаче гулбеннабар СВО доакъашхой дезалаш, тӏема операце ветеранаш бола Темарханаькъан Амиран, Евкуранаькъан Йоакъап, шахьарера хьакимаш, юкъарлон оагӏонцара болхлой.
Тӏема операце моттигашка лакха майрал, турпалал гойташ лелача вай къаман бӏухоех дийцар дешархоша; иштта Даьхенцарча безамах, турпала наькъах дувцаш байташ йийшар», - йоах тхога бенача хоамо. Турпала цӏи, лоацца цун турпала гӏулакхах дола истори дӏаяздаь улг оттадир хӏара парта тӏа.
Ишколе дешаш долча берашта ховргда, вай къаман юкъера къонгаш тӏема аренашка деналца, яхь хиларца мохк дӏабовзийташ лийналга. Тӏехьенгара тӏехьенга кхоачаш дӏагӏоргдола хӏама да из.
