Дешархошта лаьрхӀа дикача гӀулакхий болам дӀабихьар Илдарха-ГӀалий тӀа
Шахьарерча 176 тӀема операце доакъашхой, вахара хьал хала долча дезалашкарча берашта ишколе эшаш йола хӀамаш йийкъар. Дешара шу дӀадоладе эшаш мел йола хӀама чуйоалла портфелаш берашта дӀадекъача дакъа лоацаш вар шахьара да вола Дидиганаькъан Ахьмад, шахьара кхела кулгалхочун гӀонча Амаканаькъан Хьусен.
«Вай мехкада Келаматанаькъан Махьмуд-Ӏаьла ва из беркате гӀулакх юкъедаккхийтар. Доккха баркал ала доагӀа болам хьаллаьцача РФ Паччахьалкхен Думан депутата БӀарахой Бек-хана», - дийцар «Сердало» газетага Илдарха-ГӀалий тӀарча администраце.
Дуккхача дезалашта чӀоагӀа гӀо хулаш, беркате хӀама да из. Дешара шу дог делаш дӀадоладар лоархӀаме да хӀара бера, хӀаьта иштта хоза совгӀаташ декъар, Даьла раьза хургволаш, берий дог гӀоздоаккхаш хӀама да.
