СВО доакъашхошка, цар дезалашка хьожаш ба Илдарха-Гӏалий тӏа
Илдарха-Гӏалий тӏарча дегӏа хьал меттаоттадеча моттиге; дарба деш СВО доакъашхой санна, цар дезалаш а ба. «Даьхен лорабой» яхача ганзо гӏо деш дӏахьош болх ба из. «Сердалога» из хоам бера цу моттигера.
«Даьхен хӏама лораде арабаьннача бӏухой могашал меттаоттаеш, иштта царна тӏехьа гӏайгӏа, саготдарах цхьацца лазараш хьахьайнача цар цӏагӏарча нахага хьожаш болх ба цу программага гӏолла дӏахьор. Дукха ха йоацаш, шахьарера лораш ганза болхлошца цхьана, СВО ветеран волча Хадзинаькъан ӏаьлага хьожаш, тӏема аренашка вахар хаьдача бӏухочун нана Йовлой Лемхан йолча, иштта ветерана йишийна ӏамарханаькъан Заремайна гӏо деш хилар цига», - йоах тхога бенача хоамо.
«Дегӏа могашал меттаоттаеча укх моттиге тайп-тайпарча оагӏонцара гӏо ду ветеранашта, цар цӏагӏарча наха. Цу гӏулакха эшаш мел дола хӏама а ӏалашдаь долаш да. Дегӏа могашал меттаоттаярал совгӏа, ветераний, цар цӏагӏарбарий психологически хьал меттаоттадеш къахьег укхаза», - дийцар шахьарерча дарбанчен керттерча лора Хазбенаькъан Танзилас.
