Илдарха-ГӀалий тӀара Кирова цӀерах урам тоабир, къаман проектага гӀолла
Вахарера моттигаш тоаярах йолча проектага гӀолла, тоабе болабир Илдарха-ГӀалий тӀара Кирова оалаш бола урам. Шахьарерча керттерча моттигех лоархӀаш ба из урам, цунга хьежжа дикка доазув да цу балхо чулоацаргдар. Карабулакски оалача урамгара Бакински оалача наькъа дӀатӀаотташ йола 11,5 километрага кхоачаш моттиг я цу юкъе чуйодар. ГӀашлой, машинашца леларий хьал дикка аттача доаккхаш хургба из болх.
«Керда асфальт Ӏобилла, боккха болх дӀахьош дикка тоае лерхӀ из моттиг. Куц тоаде лерхӀ цу наькъа гонахьарча доазон а. Шахьарера моттигаш тоаярах йолча проектага гӀолла боаккхаш бола лоархӀаме гӀа ба из. Таханарча хано дӀадеххача тайпара, лакхача боараме тоадаь хила деза мехкара наькъаш, хӀана аьлча мехкарча наьха кхерамзлен хьал царца дувзаденна да, наькъаш дика хилар вай экономикан хьал тоадеш да», - дийцар «Сердалога» шахьарерча администраце.
ТӀадоагӀача шера чакхбаккха лерхӀаш бола из болх вай мехкá лоархӀаме ба. Шахьаре керттера лоархӀаш болча урама куц хувцарга хьежаш ба бахархой.
